ТЕАТРЕРА ВОАГ1А СО

Шекспира хана денз хьадоаг1а театр мехка сибат гойта кизга да яхаш. Театро, дика дар а во дар а хьа а хьокхаш, дикан-вон юкъера г1ей лораду, цул сов, дика-во а къоастош эздела юхьиг шийца йолаш вар, аттача а воах, нийсса, хоржам бе эшаш ме йолча метте, дикачун а вочун а масал лоаттаде торо теларца. Ишттарча хьал т1а адамий юкъарча кхоачон, къаьстта а кхетаман торон лаг1а а хале д1аотт театр, ше долаш долча метте лохарча борамал юкъарче 1окъал ца йолийта хьал лоаттаду цо, цкъа дале, шозлаг1а дале, лакхаленца ийла йолаш ме волчоа са а чот а йоацаш лакхаленга вугача наькъа такалгаш а гойт. Доалий т1аккха театр мехка лоархамег1ча кхочонех кхоачо ца халча: мехка ханна латтар, 1айнар д1а ч1оаг1 а даь д1аоттадер а, т1аккха, цу к1ийлент1ара, мохк кхы д1аха а дег1абар 1алашдер а ше халарца, театра хам баь вагвац, доккха да цох доала беркат а цох хьа хула пейда а. Г1алг1ай мехка х1анз укх сахьта дукха ханна яьнна ийла-м яц театр паччахьалкен лоарх1амехча доакъоех дакъа да яхар. 1илман даьшта, доала даьшта, къаьстта а культура йоакхон дакъа дарашта, цу ийлант1а соцалга дага да олалга а дац. Бахьанаш дукха да цу х1аман. Вешта кхы дукха театр (диъ театр ма дий тахан мехка) ше а ханнадац «Со гыций шоана!» аьнна мехкага «ц1ог1а» тоха дага. Цхьабакъда из ц1ог1а а, масса тейпа дей йокхон юхьигаш а, цу ц1ог1анца кхы т1а ч1оаг1 яла тарлуш йола, сона а, иштта дуккха кхычарна а, хозаш, (гуш а иштта) даьлар март бетта 26 дийнахь Наьсаре Доккхача ц1аг1а. Укхаза воаг1аш Г1алг1ай паччахьалкхен драматически театра 25 шу доал аьнна венавар со, цхьабакъда, сейна ца меттача беса Г1АЛГ1АЙ ТЕАТР ХЬАХУЛАЧА заман къаьд т1а нийсвалар-кхы. Сона в1алла боацача маьха ба аьнна хийттараш селла бийша баьдабац аьнна хетарал сов, доккха лаг1а даьккха дейра сона ТЕАТРА а ерригача Г1АЛГ1АЙ КУЛЬТУРА а.
Сона гуш а хозаш къезига ханнад театраца а хьашт дале ерригача культураца а чам а морзо а йолаш болча мехка бахача дуккхача а наьха лерг а са а хьосташ дола х1амаш, «Рузкъан белхаца» нийсде йиш йолаш. Белам ба Будруддина нигатаца актераш гойташ бар. Цхьабакъда, цкъа хьо велагвар вийла ваьлча, даьллахь ма атта хозача новкъа д1адерза йиш яр укх мехка ханначун а долаш долчун а, дикай ло боаха пхьоале вей яларе яха ийла хьайча, велха дог уха мара. Цхьабакъа из велар а т1аккха цу т1ехьа велхар а, шаккъе а, цхьанна а х1аман хьа дегаь ца баь тоам беш да-кха. Автора а театра а баьннача толама керттера ма1ан хетт сона цох. Цул дикаг1 а цул дезаг1 а фу худда, шийха шийга доккхал дейта дош х1анз а хазанза болча мехка? Ц1ен деддац цу веларо а цу велхаро а адамий дегаш, хьааддац т1аккха наьха б1аргаш цу доккхалах кхийна яьлча цар ийла? Сона-м долаш мо хетт. «Рузкъан болх» духхьал Горчханов Бадруддина аьттув ханна 1ац аьнна хет сона. Театра даьккха арг1анара лаг1а ханна а 1ац. Г1алг1ай культура, моллаг1ча мехка а моллаг1ча а юкъарчен доккхаг1 дола а толашаг1 дола а дакъа долча, культура а ханна д1аоттара белгало халарал сов, мехко т1еххьарча цхьайтта-шийтта шера хьийгаьча къих даьнна беркат а да пейда а ба из. Вей мехка сома валанза висар сома воккхагва аьнна хет театре ухарий белама ц1ог1о. Къора-б1арза ханнарий б1арга-лерга са дендедда хозача актерий сибаташ, дегашкар гоамалаш д1аягъйя цар хьехача наькъа т1ех ийла ерзарий. Даьра цу т1ехьа нувхех а-м ц1енлубба вей мохк. Сона иштта хет. Кхыбарашта кхыдар хета тарлой а.