Дахкилгах йола баллада

Пхьагал баьццар яр.
Ча яр – шецца й1аьха.
К1оажув бола туфлеш
Ювхаш доаг1ар цогал.

Берзо фата еттар,
М1араг1 м1ара етташ…
Чаь т1ара 1и г1еттар,
Б1алгах церг а етташ

К1аьнка молаш долча
Оаркхо чу а деттà…
Лàттар боаккха дахка
Дукха лаьттà эттà.

Гаьна доаццаш «мур-мур»
Оалаш долча циска
Фу деддар-те яхаш
Лàттар боккха дахка.

Циск ше хьа а дàцар,
Циск ше меца дàцар.
Нане мартаг1 кхийтта,
Ловза т1ера дàцар.

Фу деддар цу мискаь?
Наггахь мàра боаца
Аьттув бар цун баьннар.
Дахкà из фуд хàцар.

Хейна халча-м шортта
Д1а г1об ма бар дахка,
Циска т1одà лалла
Доллача ший ц1аг1а.

Хейна халча-м, даьра,
Дукха ма дар даь хур.
Хейна халча-м, даьра,
Дукха ма дар даь хур.

Цхьабакъда ца хой а
Кхелà духьал отта
Лаьрхар-кх вей дахка –
Бол из наькъах г1орта.

Дукха лаьттà эттà
Юкъ хьал нийс а яь ший,
Болабалар дахка,
Кхача долча цици.

Цице-м ший «мур» дора,
В1алла ийла йоаца.
Дахка а ший хур дора,
Яккха из юкъ лоаца.

Бакъда дег1à доацар,
Дег1à мичад хьона.
Дег1à дацар лоаца
Юкъ яккха дахкà а.

Хьайра цице мекхильг,
Дахка гарга беча.
Хийтар цунаг1 бекъилг
Дахкà, боацча ховча.

Даьлар цунга ц1ог1а.
Дийлар цице ног1ар.
Пен тет цице г1ог1а,
Т1од доал цице оаг1ора.

Дахкильга фу дерд х1анз?
Дахкильга ц1ий кхехк х1анз!
Къайлàй дахка къорг. 1анз!
Бац из го кхы ший «ганз».

Корзаг1баьлар дахка.
Аьлар цо: «Хьо, хьакха,
Фу де йоал укх коа са.
Йоакх аз х1анз из мос хьа».

Цу тейпа боа «бегаш»
Дахка бебба мотташ,
Даьра, циск ма дацар.
Мекх ший доада ланзар.

Дыр цо «хьоарча» ший ц1ог.
Пенах къоастош ший ког,
Цици меттахьдаьлар.
- Нани, нани! – аьлар,

Эг1чу 1очу хьедаш.
Дахка халха бувлар
Ший коа йиш а лекхаш.
Цунга белар дувлар.

…Иштта ханнад дàим,
Чу са дале хьона,
Эшодда 1а лом а.
Ч1оаг1а лов из сона.